Error message

Deprecated function: The each() function is deprecated. This message will be suppressed on further calls in menu_set_active_trail() (line 2405 of /home/t40wi9z3tbcw/public_html/includes/menu.inc).

አዋጭ የገንዘብ ቁጠባ እና ብድር ኃላ/የተ/መ/ህ/ስ/ማህበር በ2011- 2012 በጀት ዓመት 42.9 ሚሊዮን ብር አተረፈ!!

መስከረም 21 ቀን 2013 ዓ.ም. (አዲስ አበባ፣ አዋጭ)

አዋጭ የገንዘብ ቁጠባና ብድር ኃላፊነቱ የተወሰነ መሠረታዊ ኅብረት ሥራ ማኅበር የጠቅላላ አባላት ተወካዮች ም/ቤት 14ተኛ መደበኛ ጉባኤ ከፌደራል ህብረት ሥራ ኤጀንሲ የፋይናንስ ግብይት ልማት ዳይሬክቶሬት ዳይሬክተር አቶ ብርሃኑ ዱፌራ እና የህብረት ሥራ ኦዲት ዳይሬክቶሬት ዳይሬክተር አቶ ዳሬቦ ቡሴር በተገኙበት በራስ አምባ ሆቴል መስከረም 16/2013 ዓ.ም ተካሄደ፡፡ በጉባኤውም ላይ የህብረት ስራ ማኅበሩ መሥራችና ዋና ሥራ አስኪያጅ አቶ ዘሪሁን ሸለመ የህብረት ስራ ማኅበሩን ዓመታዊ (ከሐምሌ 2011 - ሰኔ 2012) ዝርዝር የሥራ አፈጻጸም ሪፖርት ለጠቅላላ ጉባኤ ተወካዮች አቅርበዋል፡፡ በመቀጠልም በፌደራል ኅብረት ሥራ ኤጀንሲ ኦዲት ባለሙያዎች አማካኝነት ከሰኔ 2011 ዓ.ም እስከ ሰኔ 2012 ዓ.ም የህብረት ስራ ማኅበሩን የአንድ ዓመት የሂሳብ እንቅስቃሴ ምርመራ ውጤት (የኦዲት ሪፖርት) በዝርዝር የቀረበ ሲሆን፤ በ2012 ዓ.ም በጀት ዓመት የህብረት ሥራ ማህበሩ ሀብት ወደ ብር 952.9 ሚሊዮን ማደጉን እና 42.9 ሚሊዮን ብር ማትረፉን ኦዲተሮቹ ገልጸው ህብረት ሥራ ማህበሩ በአጠቃላይ የሂሳብ ፍሰቱ ጤናማ የሆነና እጅግ በጣም ጥሩ በሚባል የሥራ እንቅስቃሴ ላይ እንደሚገኝ ለጠቅላላ ጉባዔ ተወካዮች ገልፀዋል፡፡

የጠቅላላ ጉባኤ ተወካዮች ም/ቤት አባላትም የህብረት ስራ ማኅበሩን ዓመታዊ የሥራ አፈጻጸም ሪፖርት እና የኦዲት ሪፖርት ካዳመጡ በኋላ በሁሉም ዘርፍ የታየውን አመርቂ አፈጻጸም ከነበረው የኮሮና ወረርሽኝ ተግዳሮት አንፃር ከሚጠበቀው በላይ እንደሆነ በመግለጽ ህብረት ሥራ ማህበሩ ባተረፈው 42.9 ሚሊዮን ብር መሰረት የ2012 ዓ.ም. ዓመታዊ የትርፍ ክፍፍል በአንድ ዕጣ/ሼር 24% እንደሆነ በመወሰን አጠቃላይ ሪፖርቱን በሙሉ ድምፅ አጽድቀዋል፡፡

በተጨማሪም በአቶ ዘሪሁን ሸለመ የህብረት ስራ ማኅበሩ የ2013 በጀት ዓመት ዓመታዊ የሥራ ዕቅድ ቀርቧል፡፡ የጠቅላላ ጉባዔው ተወካዮችም በቀረበው ዓመታዊ ዕቅድ ላይ ከተወያዩ በኋላ እቅዱን በአንድ ድምፅ አጽድቀዋል፡፡

በመጨረሻም የፌደራል ኅብረት ሥራ ኤጀንሲ ተጋባዥ እንግዳ የፋይናንስ ግብይት ልማት ዳይሬክቶሬት ዳይሬክተር አቶ ብርሃኑ ዱፌራ አዋጭ በጥሩ ሁኔታ እያደገ ያለ የገንዘብ ቁጠባና ብድር ኅብረት ሥራ ማኅበር መሆኑን ገልፀው ለዚህም አመራሩን ሰራተኛውን እና ምክር ቤቱን አመስግነዋል፡፡