አቶ ዘሪሁን ሸለመ/የአዋጭ መስራች እና ዋና ስራ አስኪያጅ

አዋጭ የገንዘብ ቁጠባና ብድር ኃላ.የተ.የኅ.ሥራ ማህበር ህብረተሰቡ ከሚያገኘው ገቢ ላይ የተወሰነ ገንዘብ በመቆጠብ እራሱን በራሱ እነዲረዳና የቁጠባ ባህልን ለማዳበር እንዲሁም ፈጣን የሆነ የብድር አገልግሎት ለአባላት ለመስጠትና የበኩላችንን በአገር ኢኮኖሚ ግንባታ ላይ ለውጥ ለማምጣት ታስቦ በ41 መሰራች አባላት(33 ሴቶችና 8 ወንዶች) አማካኝነት መጋቢት 1999ዓ.ም. ተመሰረተ፡፡ የተመሰረተውም የህብረት ስራ ማህበራትን ለማደራጀት በወጣው አዋጅ 147/91 እና በተሻሻለው 402/96 ሲሆን በፌዴራል ህብረት ስራ ኤጀንሲ ስር በመመዝገብ በአዲስ አበባና በዙሪያዋ ላሉ ነዋሪዎች አገልግሎት እየሰጠ ይገኛል፡፡ ከማህበሩ መስራቾች አባላት መካከል አንዱ የሆኑት አቶ ዘሪሁን ሸለመ ማህበሩ እንዲመሰረት ያነሳሳቸውን ሲናገሩ “ተቀጥረው ይሰሩበት በነበረው መንግስታዊ ባልሆነው ድርጅት ያሉ ሰራተኞች በተለይ እሳቸው ኮኦርድኔት የሚያደርጉት በተለያየ ጊዜ ለትምህርት ፣ለቤት ዕቃ መግዣ፣ ለኮንዶሚኒየም ቤት ክፍያ፣ለቤት መስሪያ፣ ለሰርግ፣ ለተለያዩ ነገሮች ሰራተኞች ብድር ሲፈልጉ መስሪያ ቤቱ ለብድር የሚሆን ገንዘብ ስለሌለው ማግኘት አለመቻላቸው እንደሆነ ይናገራሉ” ይህ ችግር ሲደጋገም ስለተመለከቱ የጋራን ችግር በጋራ ለመፍታት እንደሚቻል ሰራተኞቹን በማሳመን ለዚህም ደግሞ ገንዘብና ቁጠባ ማህበር ቢመሰርቱ መፍትሄ እንደሚሆን በማስረዳትና አደራጁንም አካል በመጥራት የአራዳ ክፈለ ከተማ ህብረት ስራ ማደራጃ ቢሮ የደራጃቸው ሲሆን የማህበሩ መስራች አቶ ዘሪሁን ሸለመም የማህበሩ የመጀመሪያ ሊቀመንበር ሆነዋል፡፡ ማህበሩን ጥር 1 ቀን 2003ዓ.ም. በ146 አባላትና ከግማሽ ሚሊዮን ብር በታች በሆነ ካፒታል የተረከቡት አቶ ዘሪሁን ከስድስት ወር በኃላ ማህበሩ ኦዲት ሲደረግ የአባላቱን ቁጥር 300 በማድረስ እና የማህበሩን ካፒታል ወደ 1183294 (አንድ ሚኒዮን አንድ መቶ ሰማኒያ ሶስት ሺህ ሁለት መቶ ዘጠና አራት) በማድረስ ከፍተኛ ስኬት አስመዝግበዋል፡፡ ይህው ስኬት በእጥፍ እንዲቀጥል ለ2004ዓ.ም. የታቀደ ቢሆንም በበጀት ዓመቱ መጨረሻ ግን ከአራዳ ክፍለ ከተማ ማህበራት ማደራጃ ቢሮ ኦዲት ሪፖርት ማረጋገጥ እንደተቻለው ማህበሩ ከዕቅድ በላይ ሰርቶ የአባላቱን ቁጥር 622 እና የማህበሩን ሀብት ወደ 3391704 (ሶስት ሚሊዮን ሶስት መቶ ዘጠና አንድ ሺህ ሰባት መቶ አራት ብር ) ማድረስ ተችሏል፡፡